No ano 2012 a empresa A Citania Arqueoloxía e Xestión do Patrimonio, por encargo do concello de Xermade, desenvolveu unha serie de traballos arqueolóxicos que permitiron coñecer mellor o pasado da explotación do carbón vexetal e do ferro na antigüidade da parroquia de Lousada. Como consecuencia daquela intervención hoxe temos a Ruta do Batán que os camiñantes percorren á beira do río até acadar a aldea de Folgoso, logo de teren visitado varios antigos enxeños hidráulicos entre os que destaca o Batán de Folgoso, de propiedade privada, nun excepcional estado de conservación malia que ameazado polo desleixo e abandono. O camiño descorre baixo a frondosa carballeira autóctona na que medran, senlleiros, algúns dos exemplares mais monumentais da contorna desta parte da cunca do Eume.
As datacións realizadas pola empresa A Citania, sobre carbóns atopados en contexto, indican que durante un milenio, cando menos, houbo unha produción sostible de ferro e carbón nesta área. Actualmente, os veciños e veciñas da contorna celebran cun xantar popular aquela iniciativa. A idea de investigar o pasado da Casa da Neveira, o seu significado e magnitude no contexto histórico, naceu de resultas e pouco a pouco callou como o proxecto de cooperación internacional e multidisciplinar que é hoxe en día.
 |
|---|
 |
 |
 |
 |
 |
 |
 |
 |
 |
 |
 |
 |