No que atinxe ás poboacións de animais da contorna, son tamén moitas as implicacións culturais que se poden establecer. Do mesmo xeito que acontece cas cuestións botánicas, baixo esta etiqueta agruparemos temas que permitan ver e reflexionar sobre aspectos habitualmente pouco transitados da fauna, e que a sociedade actual non ten precisamente en primeiro plano. As dimensións míticas de certos animais, o seu rol no imaxinario popular e a súa condición de actores dentro do espectáculo da cultura son temas clásicos da etnografía galega e mundial. Por suposto, a parroquia de Lousada tampouco é allea a esta dinámica e participa con voz propia nesta construción coral. Unha realidade da que aquí se pretende, apenas, deixar constancia. Noutras entradas achegaremos imaxes ou documentos sen mais pretensión que a ilustración da realidade da existencia dun interesante sistema relacións entre os seres vivos que manifeste que igual que sucedeu no pasado ca vella sociedade, a sociedade actual pode e mesmo debe estruturar ó redor dese sistema un novo conxunto de valores e significados. É dicir, igual que acontece cos restos da Neveira de Lousada, compre dotar dun sentido no presente a aquilo que herdamos do pasado.