As seguintes páxinas abordan de xeito monográfico as cuestións relacionadas co medio natural no que se integra a Neveira. Como resulta evidente, este transcende tanto á Parroquia de Lousada e tamén a outros contextos. A realidade das interaccións no medio natural, os seus condicionantes e requisitos de viabilidade farán que, tal como facemos no resto deste sitio, en moitas ocasións enfoquemos os contidos dende o punto de vista das conexións que os elementos presentes na contorna inmediata da Neveira de Lousada, teñen con outros cos que están relacionados. Esta perspectiva permite observar como, efectivamente e malia a diminuída realidade material actual do vello edificio da neveira da Serra da Carba, a súa “sombra” pode ser moi alongada.

​

​

​

​

​

​

​

​

 

 

Deste xeito, veremos como nos arredores existe un medio inda diverso e rico en elementos de grande interese natural. Actualmente, a principal industria potencial dun área non industrial é a desindustrialización mesma. A xestión dunha combinación de patrimonio natural ben dotado, e un patrimonio histórico artístico ben conectado inda cas manifestacións inmateriais da tradición local, poden ser unha receita de éxito cando se trata de promover un desenvolvemento sostible e que xere un axeitado reparto de rendas sobre a economía local. Se isto se produce a carón de áreas industriais e urbanas, como é o caso, as posibilidades de este tipo de desenvolvemento inzan notablemente.

Nesta etiqueta iremos fiando ó redor dos pequenos e grandes tesouros naturais da contorna. Este haberá de ser, tamén, outro facho aceso que guíe cara Lousada e arredores, tanto de xeito virtual como convencional, ás persoas e colectivos interesados no coñecemento do medio natural e as posibilidades de aprendizaxe, goce e experimentación que del derivan.