A Neveira de Lousada atópase na Serra da Carba, ó suroeste da do Xistral, na contorna da Mariña Norte galega e na linde das actuais provincias da Coruña e Lugo.

Estes montes acadan mais de mil metros de altitude e reciben dirante todo o ano a humidade oceánica. As precipitacións son, xa que logo, abondosas e boa parte delas, historicamente, en forma de neve.

Por entre a Carba e o Xistral, con rumbo oeste, baixa o Eume recollendo as augas deste planalto. Trátase dunha paisaxe de dondas serras e tesos, cubertos de bos pasteiros e grandes áreas de uces e toxos. Unha penechaira de bestas albiscadas entre a brétema e unha grande diversidade natural.

​