N este apartado, abordaremos a exposición das crenzas, os contidos míticos e os ritos que teñan relación ca Neveira de Lousada. O repertorio de crenzas, mitos e ritos dun grupo constitúe unha sorte de realidade aumentada; unha estratexia cultural orientada a fixar, compactar e polarizar a unidade de acción dunha comunidade concreta. Cando dentro de cada sociedade, as persoas miran cara algún elemento cultural perciben moito mais que o elemento en si mesmo. Perciben os estratos de valor engadido depositados no pasado en forma de tradicións e outros contidos. Cada xeración vai engadindo material cultural e actualizando o recibido. A paisaxe local vaise construíndo colectivamente e afirmándose como unha paisaxe emocional; unha escena coral que interpela a cada paso a quen sabe interpretala. Un panorama tecido comunalmente onde cada nome de finca, parcela, lugar, praza, eido, casa, horta, capela, etc, remite a unhas circunstancias nas que conviven os planos dos feitos, dos sucesos mitificados e dos mitos acontecidos, en todas as  gradacións destas coordenadas.

​

​

 

 

 

 

Trataremos, pois, das lendas, contos e ditos recollidos na contorna; mais tamén dos feitos por medio dos cales o contexto da Neveira, nomeadamente a parroquia de Lousada, resulta “amplificado” e ela mesma proxectada dalgún xeito cara ámbitos mais amplos que serven para que a súa imaxe adquira meirande definición e a súa memoria cultural contribúa á creación dun presente cun mellor porvir.